Friday, February 18, 2011

မြန်မာ့ရိုးရာ မြေထည်လုပ်ငန်း အိုးနှင့် လူသုံးကုန်ပစ္စည်းများ အသုံးပြုမှု အားကောင်းနေဆဲဖြစ်၍ ပခုက္ကူအိုးပွဲတော် နှစ်လတာအထိ ပွဲတော်ရက်ရှည် ခင်းကျင်းပြသ

ပခုက္ကူမြို့ မြောက်ဖျားတွင် တည်ရှိသော ''ကိန္နရာတောင်'' ''ကုသိန္နရုံတောင်'' ဗုဒ္ဓပူဇနိယပွဲတော်တွင် ယခင်ခေတ် အခါက ''နှမ်းမနှဲသည်များ'' အများအပြား လာရောက် ရောင်းချ၍ နှမ်းမနှဲ ဘုရားပွဲဟု ဒေသခံများက ခေါ်ဆိုခဲ့ကြပြီး ယနေ့ခေတ် အခါတွင် နှမ်းမနှဲအစား ပခုက္ကူနယ်၊ ညောင်ဦးနယ်၊ မြိုင်နယ်၊ ရေစကြိုနယ် အတွင်းရှိ ငါ့သရောက်၊ နဘတ်၊ စဘေ၊ မြောက်ပြင်၊ သက်ရွာ၊ ပေါင်လောင်ကန်၊ ပခန်းကြီး၊ ဆပ်သွား စသည့် ဒေသများမှ အိုးနှင့် မြေထည် လူ့အသုံးအဆောင်များ ရောင်းဝယ်မှု အားကောင်းလာ၍ ''အိုးပွဲတော်''ဟု ဒေသခံများက ပြောင်းလဲ ခေါ်ဝေါ်လာကြသည်။

''အိုးပွဲတော်လို့ တွင်လာတာနဲ့ ပွဲတော်ရက်ကလည်း ရှည်လာတယ်။ အခုဆို ပြာသိုလဆန်း ကတည်းက ဈေးသည်တွေ ရောက်နေကြပြီ။ တပို့တွဲ လကုန်အထိ ပွဲဈေးက  ရှိနေတယ်။ ပါလာတဲ့ အိုးနှင့်လူ့အသုံးအဆောင် ပစ္စည်းတွေအပြင် အိုးပုတ် ချိုးရုပ်ပါ မကျန် ပါသမျှ အကုန်နီးပါး ရောင်းရတယ်''ဟု အိုးပွဲတော် ဈေးသည်တစ်ဦးက ပြောပြသည်။ သောက်ရေအိုး၊ သုံးရေအိုး၊ အင်တုံ၊ စလောင်းဖုံး၊ ရေနွေးကရား၊ ဟင်းချက်အိုး၊ ပန်းအိုး၊ ညောင်ရေအိုး၊ အတာအိုးများအပြင် ကလေးများအ ကြိုက် ကစားစရာ အိုးပုတ်ချိုးရုပ် (ရုပ်)များပါ ဈေးနှုန်းချိုသာစွာ ရောင်းချသည့်အပြင် အိုးနှင့်မြေထည်ပစ္စည်း ဆိုင်အများစုသာ ခင်းကျင်းရောင်းချလျက် ရောင်းဝယ်မှု အားကောင်း၍ မြေထည်လုပ်ငန်းများနှင့် အသက်မွေးဝမ်းကျောင်း ပြုသော ဒေသခံ တောင်သူဦးကြီးများ၏ စီးပွားရေးအား တစ်ဖက်တစ်လမ်းမှ အထောက်အကူ ပြုစေသည့် အိုးပွဲတော် ဖြစ်ကြောင်းလည်း သိရသည်။ ရှားပါး၍ ရောင်းဝယ်မှု အားကောင်းသောကြောင့် မြန်မာ့ရိုးရာ အိုးလုပ်ငန်းနှင့် မြေထည် လုပ်ငန်း လုပ်ကိုင်ကြသူ တောင်သူ ကျေးလက် ပြည်သူများအား အထူး အားထား၍ ပခုက္ကူအိုးပွဲတော်သို့ နှစ်စဉ်မပျက် လာရောက် ရောင်းချကြသည်။

''အိုး၊ အင်တုံပေါင်း နှစ်စဉ် တစ်သိန်းကျော်အထိ ရောင်းရတယ်။ ပခုက္ကူတစ်မြို့လုံးအပြင် ဒေသ၀န်းကျင် ကျေးလက်တွေကပါ လာရောက် ၀ယ်ယူကြတယ်။ အမြင့်ဆုံး ဈေးကျပ် ၁၅၀၀ ကနေ ကျပ် ၅၀ တန်၊ ကျပ် ၂၅ တန် အနိမ့်ဆုံးရှိတယ်။ တပို့တွဲ လပြည့်နေ့ကတော့ အိုးပုတ်ချိုးရုပ်သံ လွှမ်းတဲ့နေ့ပေါ့ဗျာ''ဟု ပခုက္ကူမြို့သား တစ်ဦးက ပြောကြားသည်။

ယနေ့တိုင် ပခုက္ကူတစ်ခရိုင်လုံး အိုးနှင့် မြေထည် လူသုံးကုန် ပစ္စည်းများ သုံးစွဲမှုအားကောင်းလျက် ရှိနေသောကြောင့် မြန်မာ့ရိုးရာ စစ်စစ်လုပ်ငန်းများ မတိမ်ကော မပျောက်ပျက် ရှိနေပါကြောင်း ဒေသခံများက ပြောကြားခဲ့ပါသည်။

Source : news-eleven

No comments:

Post a Comment

Thank you for your comment on my blog, Anythig you can suggesting and discuss to me.