အင်းလေးကန် ရေရှည်တည်တံ့ရေးကို ထိခိုက်စေသော ဟိုတယ် တည်ဆောက် သူများရှိလျှင် ပြင်းထန်စွာ အရေးယူပေးရန် ဟိုတယ်နှင့် ခရီးသွားလာရေး လုပ်ငန်းဝန်ကြီးဌာန ပြည်ထောင်စု ၀န်ကြီး ဦးဌေးအောင်က ပြည်နယ်အစိုးရကို ပြောကြားလိုက်သည်။ အင်းလေးကန်တွင် မေ ၈ ရက် ၌ပြုလုပ်ခဲ့သော ကန်ရေရှည် တည်တံ့ ရေး ဆွေးနွေးပွဲတွင် ပြောကြား ခဲ့ခြင်း ဖြစ်သည်။

အင်းလေးကန်ဒေသ၌ အသစ် အကောင်အထည် ဖော်နေသော ဟိုတယ်ဇုန်ကို ကန့်ကွက်သည့် ဆနပြပွဲနှင့် အသစ်ထပ်မံ ခွင့်ပြု လိုက်သော ဟိုတယ် ၁၄ လုံး အနက် ဟိုတယ် တစ်လုံးက အင်းလေးကန် စပ်တွင် မြေဖို့ခြင်း ကိစ္စရပ်များ ဖြစ်ပွားပြီးနောက် ရှမ်းပြည်နယ် အစိုးရအဖွဲ့၊ ဟိုတယ်နှင့်ခရီးသွားလာရေး လုပ်ငန်း ၀န်ကြီးဌာန၊ ပတ်ဝန်းကျင် ထိန်းသိမ်းရေးနှင့် သစ်တောရေးရာ ၀န်ကြီးဌာနနှင့် အရပ်ဘက် အဖွဲ့အစည်းများ လေးပွင့်ဆိုင်တွေ့ဆုံသည့် ဆွေးနွေးပွဲလည်း ဖြစ်သည်။

“စည်းကမ်းနဲ့ မညီညွတ်တဲ့ ဟိုတယ်တွေကို ညှာတာမှာမဟုတ်ဘူး။ ပြည်နယ်အစိုးရကလည်း ဥပဒေ အတိုင်း အရေးယူပေးပါ။ စည်းကမ်းနဲ့ မညီညွတ်ရင် ဟိုတယ်ခရီးကလည်း ထောက်ခံပေးမှာမဟုတ်ဘူးလို့ ပြတ်ပြတ်သားသား ပြောသွားတဲ့အတွက် သဘောကျတယ်။ လုပ် မလုပ်တော့ ကျွန်တော်တို့ စောင့်ကြည့်ရ မယ်”ဟု ဆွေးနွေးပွဲတက်ရောက်ခဲ့သူ အင်းစာပေယဉ်ကျေးမှုမှ ဦးသာဒိုးကပြောသည်။ အင်းလေးကန်စပ်တွင် ပြီးခဲ့သည့် ဧပြီလဆန်းမှစ၍ တဖြည်းဖြည်းမြေဖို့ခြင်းပြုလုပ်ခဲ့သော ဟိုတယ်ကို ဧပြီလတတိယပတ်၌ အမိန့်ကြေညာချက်ထုတ်ပြန်ကာ ယာယီတားမြစ်ခဲ့သည်။ သို့သော် ဖို့မြေများကို ပြန်လယ်ဆယ်ယူခြင်းနှင့် အရေးယူခြင်းများကိုမူ မည်သည့် အစိုးရအဖွဲ့နှင့် တာဝန်ရှိသူများကမှ တိကျရေရာစွာ ပြောကြားခဲ့ခြင်း မရှိကြောင်း ဦးသာဒိုးက ပြောသည်။

“ပတ်ဝန်းကျင်နဲ့ သစ်တော ပြည်ထောင်စုဝန်ကြီးကတော့ ဖို့ထားတဲ့မြေတွေ ပြန်ဆယ်ပေးမယ်လို့ ပြောတယ်။ ဘယ်ရက်သယ်ခိုင်းမယ်ဆို တာတော့မပြောဘူး”ဟု ဦးသာဒိုးက ပြောသည်။ အင်းလေးကန် မြေဖို့ခြင်းမှာ အသစ်တည်ဆောက်နေသော ဟိုတယ်ဇုန်တွင် ဖြစ်ပေါ်နေခြင်း မဟုတ်ဘဲ ဆောက်လက်စနှင့် ဆောက်လုပ်ဆဲ ဟိုတယ်များ ၇၀ ရာခိုင်နှုန်း ပြီးစီးနေပြီဟုဆိုကာ ဆက်လက်ဆောက်လုပ်ခွင့် ပြုခဲ့သည်။ ဟိုတယ် ၁၄ လုံးအနက် တစ်လုံး၌ ပြဿနာပေါ်ခြင်းဖြစ်သည်။

ဟိုတယ် ၁၄ လုံ အနက် နှစ်လုံးမှာ အမှန်တကယ် ဆောက်လုပ်ဆဲဖြစ်သော်လည်း ကျန်ဟိုတယ်များမှာ ဆောက်လုပ်မှု ၇၀ ရာခိုင်နှုန်း ပြီးစီးခြင်းမရှိသည့် ဟိုတယ်များဖြစ်ကြောင်း ဒေသခံများက ပြောသည်။ အင်းလေးကန်တွင် ရေခန်းခြောက်ခြင်း၊ ဟိုတယ်ကမ်းစပ်မြေဖို့ ခြင်းနှင့် ဟိုတယ်ဇုန်လျော်ကြေးများနှင့် ပတ်သက်၍ ပြည်ထောင်စုဝန် ကြီးနှစ်ဦးအပါအ၀င် သက်ဆိုင်ရာ ဌာနဆိုင်ရာဝန်ထမ်းများ၊ရှမ်းပြည် နယ် အစိုးရ အဖွဲ့ဝင်များ၊ နိုင်ငံရေးပါတီများနှင့် အင်းတိုင်းရင်းသားရေးရာဝန်ကြီးတို့၏ သုံးပွင့်ဆိုင် အစည်းအဝေးကို ယနေ့ည ၇ နာရီမှ စတင်ကာ တောင်ကြီးမြို့၌ တံခါးပိတ်အစည်းအဝေး ပြုလုပ်ကြမည်ဟု သတင်းရရှိသည်။ 

Source :7Day News

0 Comments:

Post a Comment



Post a Comment

Thank you for your comment on my blog, Anythig you can suggesting and discuss to me.

Creative Commons License