Wednesday, June 26, 2013

အနာဂတ်မရေရာသည့် မြန်မာ့ခရီးသွားလုပ်ငန်း

ဟိုတယ်အခန်းခဈေးကြီးသည်ဟု နာမည်ကြီးသော မြန်မာနိုင်ငံတွင် လာမည့်ခရီးသွားရာသီ အတွက် ကမ္ဘာလှည့်ခရီးသွားများ၏ အခန်းကြိုတင်မှာယူမှုလျော့နည်းနေ
----------------------------------
လာမည့် ခရီးသွားရာသီအတွက် ခရီးစဉ်များရောင်းချရာတွင် စိတ်ဝင်စားသူနည်းပါးနေပြီး ၀ယ်ယူသူ နည်းပါးနေကြောင်း ခရီးသွားကုမ္ပဏီများထံမှ သတင်းရရှိသည်။

မြန်မာပြည်ဆိုတော်ပါပြီ။ ဈေးကြီးတယ်ပဲပြောနေကြတယ်” ဟု မြန်မာနိုင်ငံခရီးသွားလုပ်ငန်းရှင်များအသင်း ဥက္ကဋ္ဌ ဒေါက်တာအောင်မြတ်ကျော်က ပြောသည်။ ထို့ကြောင့် ၂၀၁၂ ဇွန်လသို့ ရောက်ရှိလာသော်လည်း လာမည့်ခရီးသွားရာသီ (၂၀၁၃ အောက်တိုဘာမှ ၂၀၁၄ ဧပြီ ကာလအထိ) အတွက် နှစ်စဉ် ရောင်းချနေကြသော အုပ်စုလိုက်ခရီးစဉ်များမှာ ယခုအချိန်အထိ မရောင်းချရသေးကြောင်း Nature Dream ခရီးသွားကုမ္ပဏီမှ အုပ်ချုပ်မှုဒါရိုက်တာ မစပယ်အောင်က ပြောသည်။

ကမ္ဘာ့စီးပွားရေးဖိုရမ်၊ အရှေ့တောင်အာရှ အားကစားပြိုင်ပွဲ အာဆီယံထိပ်သီးအစည်းအဝေးများကြောင့် သံတမန်များ၊ အားကစားသမားများ၊ စီးပွားရေးသမားများကြောင့်၊ ၂၀၁၃-၂၀၁၄ တွင် နိုင်ငံခြားသား လာရောက်မှုမှာ သိသိသာသာ လျော့မသွားနိုင်သော်လည်း ကမ္ဘာလှည့်ခရီးသွား လာရောက်မှုမှာ လာမည့် ရာသီတွင် လျော့သွားဖွယ်ရှိသည်။

ဦးသိန်းစိန်အစိုးရတက်လာပြီးနောက် မြန်မာနိုင်ငံသို့ ကမ္ဘာလှည့်ခရီးသွားများ၊ နိုင်ငံတကာသံတမန်များနှင့် စီးပွားရေးလုပ်ငန်းရှင်များ လာရောက်မှု မြင့်တက်လာပြီး ဟိုတယ်အခန်းခများမှာ ဈေးတက်လာခဲ့သည်။
ပြီးခဲ့သည့် ၂ နှစ်နှင့် နှိုင်းယှဉ်လျှင် ဟိုတယ်အခန်းခ ဈေးနှုန်းများ သုံးဆခန့်တက်သွားပြီး ဒေသတွင်းနိုင်ငံများတွင် ဈေးအကြီးဆုံး နိုင်ငံဖြစ်လာခဲ့သည်။ အထူးသဖြင့် ရန်ကုန်မြို့ရှိ အဆင့်မြင့် ဟိုတယ်များ၏ အခန်းခဈေးနှုန်းများမှာ သိသိသာသာ ဈေးတက်သွားခဲ့ပြီး ဟိုတယ်အခန်းရရန်ပင် မလွယ်ကူသော အခြေအနေထိ ဖြစ်လာသည်။

ဟိုတယ်တွေက ဈေးကြီး၊ Guide (ဧည့်လမ်းညွှန်)တွေကလည်းဈေးကြီး၊ ၀င်ကြေးတွေက မြင့်၊ အခန်းကလည်းမရဆိုတော့ ဒီနှစ်ဆို ရောင်းချင်စိတ်တောင်မရှိပါဘူး” ဟု 7 Day ခရီးသွား ကုမ္ပဏီမှ အုပ်ချုပ်မှုဒါရိုက်တာ မဒါလီက ပြောသည်။ ထို့အပြင် ဟိုတယ်များက တည်းခိုရန်အတွက် အခန်းမှာယူစဉ်ကပင် ကြိုတင်ငွေပေးချေရမည့် ပေါ်လစီ ကျင့်သုံးလာကြသဖြင့် ခရီးသွားကုမ္ပဏီများအနေဖြင့် ခရီးစဉ်များချရန် ပိုမိုခက်ခဲလာသည်ဟု ခရီးသွားကုမ္ပဏီများမှ တာဝန်ရှိသူများက ပြောကြားသည်။ ထို့အပြင် အကြောင်းအမျိုးမျိုးကြောင့် မတည်းခိုဖြစ်ပါက မှာယူထားသော အခန်းအတွက် ပေးချေထားရသည့် စရန်ငွေကို ပြန်မအမ်းပါ (Non-Refund) ဟု ဟိုတယ်နှင့် ခရီးသွား ကုမ္ပဏီများကြား ချုပ်ဆိုထားသော စာချုပ်များတွင် ပါရှိလာသည်။

ဘွတ်ကင်တင်ထားတဲ့အခန်းကို ရက်ပေါင်း ၆၀ အတွင်း၊ ရက်ပေါင်း ၉၀ အတွင်း Cancel (ဖျက်သိမ်း)လုပ်လည်း စရန်ကပြန်မရဘူး” ဟု ခရီးသွားကုမ္ပဏီတစ်ခုမှ အုပ်ချုပ်မှု ဒါရိုက်တာတစ်ဦးက ပြောသည်။ ပုံမှန်အားဖြင့် နိုင်ငံတကာဟိုတယ်များတွင် ၄၅ ရက်မတိုင်မီ မှာယူထားသော အခန်းကို ပြန်လည်ဖျက်သိမ်းပါက ငွေကြေးတစ်စုံတစ်ရာမပေးရဘဲ ဂျာမနီနိုင်ငံတွင် ခရီးစဉ်မတိုင်မီ တစ်လကြို၍ ခရီးစဉ်ဖျက်သိမ်းပါက ငွေကြေးတစ်စုံတစ်ရာမပေးရချေ။ ပြည်ပနိုင်ငံများရှိ ခရီးသွားကုမ္ပဏီများက မြန်မာနိုင်ငံအတွက် ခရီးစဉ်များရောင်းချရာတွင် အနည်းဆုံးခြောက်လ၊ တစ်နှစ်ကြိုရောင်း
ချကြသည်။ ထို့ကြောင့်ပင် ခရီးသွားများလာရောက်မှုနည်းသော ယခုနှစ်မေလအတွင်း ကမ္ဘာ့လှည့် ခရီးသည်များ ၀င်ရောက်မှုများ လျော့နည်းနေသည်။

ဒီနှစ်မိုးရာသီက မနှစ်ကထက်နည်းတယ်။ လာမယ့်ရာသီအတွက်က သိပ်မရှိသေးဘူး” ဟု ပုဂံဒေသရှိသိရိပစ္စယာဟိုတယ်မှ ဈေးကွက်မန်နေဂျာ မစုစုခိုင်က ပြောသည်။
ထို့အပြင် ဧည့်သည်ရရှိမှု နည်းပါးသဖြင့် ဂျာမနီအခြေစိုက် Condo လေကြောင်းလိုင်းနှင့် ဟောင်ကောင်အခြေစိုက် EVA လေကြောင်းလိုင်းများမှ မြန်မာနိုင်ငံသို့ ပျံသန်းသော ခရီးစဉ်များ ရပ်နားထားခဲ့ကြသည်။

အစ်မတို့လည်း Connection Flight တွေရှိလို့ တော်နေသေးတယ်” ဟု စင်ကာပူမှ မြန်မာနိုင်ငံသို့ ပျံသန်းနေသော Silk Air လေကြောင်းလိုင်းမှ တာဝန်ရှိသူ တစ်ဦးကပြောသည်။
သို့သော် အစိုးရက ပြုစုထားသော စာရင်းများအရ ယခုနှစ်မေလအတွင်း ရန်ကုန်လေဆိပ်သို့ ဧည့်သည်ဝင်ရောက်မှုမှာ ယမန်နှစ်ကထက် ၄၀ ရာခိုင်နှုန်း ပိုများခဲ့သည်။
ထို့အပြင် ၂၀၁၁ ခုနှစ်မှစ၍ မြန်မာနိုင်ငံသို့ ကမ္ဘာ့လှည့်ခရီးသည် ၀င်ရောက်မှုမှာ နှစ်စဉ်မြင့်တက်လာခဲ့ပြီး နှစ်စဉ် ၃၀ ရာခိုင်နှုန်းခန့် တိုးလာခဲ့၍ ပြီးခဲ့သည့်နှစ်တွင် ရန်ကုန်လေဆိပ် ၀င်ပေါက်မှ နိုင်ငံခြားသား ခြောက်သိန်းခန့်ဝင်ရောက်ခဲ့သည်။ ထို့ကြောင့် လိုအပ်လျက်ရှိသော ဟိုတယ်အခန်းများ တိုးချဲ့ရန်အတွက် ဟိုတယ်အသစ်များ တိုးချဲ့တည်ဆောင်လာကြသည်။ ၂၀၁၃ ခုနှစ်တွင် ရန်ကုန်မြို့၌ Novotel Hotel Center , Point Hotel Amara Rose Hotel တို့ ဖွင့်ရန်ပြင်ဆင်နေပြီး ဟိုတယ်အခန်းပေါင်း ၈၀၀ ကျော် တိုးလာမည်ဖြစ်သည်။ အစိုးရအနေဖြင့် ၂၀၁၃ ခုနှစ်အတွင်း ဟိုတယ်အခန်းပေါင်း ၄၀၀၀ ခန့်ရရှိရန် မြန်မာနိုင်ငံအနှံ့အပြားတွင် စီမံကိန်းများအကောင် အထည်ဖော်လျက်ရှိသည်။

ဟိုတယ်အသစ်တွေဖွင့်လာရင်တော့ အခြေအနေကောင်းလာနိုင်တယ်။ အပြိုင်အဆိုင်ဖြစ်လာရင်တော့ ဈေးတွေလည်းဖြစ်သင့်ဖြစ်ထိုက်တဲ့ ဈေးတွေဖြစ်လာလိမ့်မယ်” ဟု 7 Day ခရီးသွားကုမ္ပဏီမှ မဒါလီက ပြောသည်။ ဟိုတယ်အခန်းခဈေးနှုန်းများကြီးကာ ဟိုတယ်များ၏ ၀န်ဆောင်မှု နိုင်ငံတကာ အဆင့်မမီကြသေးသော်လည်း မြန်မာနိုင်ငံ အခြေအနေမှာ နိုင်ငံတကာမှာ သံတမန်များနှင့် စီးပွားရေးလုပ်ငန်းရှင်များ စိတ်ဝင်စားမှုများနေသဖြင့် နိုင်ငံခြားသားများ ၀င်ရောက်မှုမှာ ရန်ကုန်မြို့နှင့် နေပြည်တော်တို့တွင် ၀င်ရောက်မှုလျော့မသွားနိုင်ဘဲ ကမ္ဘာလှည့်ခရီးသွားများ လာရောက်မှုသာ လျော့ကျသွားနိုင်ကြောင်း ခရီးသွားလုပ်ငန်းရှင်များကခန့်မှန်းကြသည်။

မကြာသေးမီက နေပြည်တော်တွင်ကျင်းပသော ကမ္ဘာ့စီးပွားရေးဖိုရမ်နှင့် လက်ရှိနေပြည်တော်တွင် ကျင်းပနေသော ကျောက်မျက်ရတနာပြပွဲများကြောင့် နေပြည်တော်တွင် ဟိုတယ်အခန်းများ ဈေးနှစ်ဆခန့် မြင့်တက်သွားပြီး ဟိုတယ်များတွင်လည်း ဧည့်သည် အပြည့်အလျှံ ရရှိနေကြသည်။
ထို့အပြင် ၂၀၁၃ ခုနှစ် ဒီဇင်ဘာလတွင် ရန်ကုန်-နေပြည်တော်မန္တလေးနှင့် ငွေဆောင်ကမ်းခြေတို့တွင် အရှေ့တောင်အာရှအား ကစားပွဲများ ပြုလုပ်မည်ဖြစ်သဖြင့် ထိုကာလအတွက် ဟိုတယ်များ အခန်းပြည့်နီးပါး ရရှိထားကြသည်။ အလားတူ အာဆီယံအလှည့်ကျ ဥက္ကဋ္ဌ တာဝန်ယူမည့် ၂၀၁၄ တွင် အာဆီယံထိပ်သီးအစည်းအဝေးအပြင် ဆက်စပ်အစည်းအဝေးများကြောင့် ရန်ကုန်နှင့် နေပြည်တော်ဟိုတယ်များတွင်မူ နိုင်ငံတကာသံတမန်ဧည့်သည်များ ထပ်မံရရှိကြဦးမည်ဖြစ်သည်။
ထို့ကြောင့် ရန်ကုန်မြို့နှင့် နေပြည်တော်မြို့များတွင် ဧည့်သည်ဝင်ရောက်မှုများ လျော့နည်းမသွား နိုင်သော်လည်း “ပုံမှန်ကတော့ ကျသွားမှာမဟုတ်ဘူး။ ရေရှည်မှာတော့ အပန်းဖြေ လေ့လာရေး ခရီးစဉ်တွေကတော့ နှေးသွားနိုင်တယ်။ ရှိပြီးသားဈေးကွက်ရှယ်ယာ ကျသွားနိုင်တယ်” ဟု မြန်မာနိုင်ငံခရီးသွားလုပ်ငန်းရှင်များအသင်းဥက္ကဋ္ဌ ဒေါက်တာအောင်မြတ်ကျော်က သုံးသပ်သည်။
သို့သော် အခြေခံလူတန်းစားများနှင့် ဟိုတယ်နှင့် ခရီးသွားလုပ်ငန်းကို မှီခိုလုပ်ကိုင်နေသူများအတွက် ကမ္ဘာလှည့်ခရီးသွားများကသာ များစွာအထောက်အကူပြုနိုင်သည်။

ရေးသားသူ- အောင်သူရ - 7Day News Journal

No comments:

Post a Comment

Thank you for your comment on my blog, Anythig you can suggesting and discuss to me.