ဂျပန်ကုမ္ပဏီ ဝင်ရောက်မှု ပြည်တွင်း လေကြောင်းလိုင်းများ ဂယက်ရိုက်

Asia Wing Air မှ လေယာဉ် တစီး (ဓာတ်ပုံ – AWA)

ပြည်တွင်း ပုဂ္ဂလိကလေကြောင်းလိုင်း Asia Wing Air (AWA) ၏ အစုရှယ်ယာ ၄၉ ရာခိုင်နှုန်းကို ဂျပန် လေကြောင်းလိုင်းကြီး တခုဖြစ်သည့် All Nippon Airways (ANA) သို့ ရောင်းချရန် စီစဉ်နေခြင်းကို လေကြောင်းလိုင်း အသိုင်းအ၀န်းမှ ဝေဖန်မှုများ ရှိနေကြောင်း သိရသည်။

AWA ၏ ရှယ်ယာများကို ဝယ်ယူရန် ANA က အမေရိကန်ဒေါ်လာ ၃၀.၄၅ သန်း ပေးဖွယ်ရှိကြောင်း Nikkei စီးပွားရေး နေ့စဉ် သတင်းက အစောပိုင်းတွင် ရေးသားခဲ့သည်။

ပြည်တွင်းလေကြောင်းလိုင်းများ အကြား နိုင်ငံခြား လေကြောင်းလိုင်းများနှင့် ဖက်စက်လုပ်ကိုင်ရေးတွင် အကန့်အသတ်များ ထားရှိရေးကို မူအားဖြင့် သဘောတူထားခဲ့သော်လည်း AWA က ချိုးဖောက်ခြင်းကြောင်း ယင်းသို့ ဝေဖန်မှုများ ရှိနေခြင်း ဖြစ်ကြောင်း ပြည်တွင်းလေကြောင်းလိုင်း တခုမှ အကြီးတန်းအရာရှိတဦးက ပြောသည်။

AWA လေကြောင်းလိုင်း အစုရှယ်ယာများ ဝယ်ယူရန် စီစဉ်ခြင်းသည် နိုင်ငံခြား လေကြောင်းလိုင်းတခု အနေဖြင့် မြန်မာပြည် အခြေစိုက် လေကြောင်းလိုင်း တခုမှ ပထမဆုံး ရင်းနှီးမြှုပ်နှံမှု ပြုလုပ်ရန် ရည်ရွယ်ခြင်းဖြစ်ကြောင်း ဂျပန်လေကြောင်းလိုင်း ANA က ဆိုသည်။

“လျင်မြန်စွာ ကြီးထွားလာနေတဲ့ အာရှ လေကြောင်းလိုင်း ဈေးကွက်ရဲ့ တိုးပွားလာနေတဲ့ အစုရှယ်ယာတွေကို ANA က အမိအရ ဖမ်းဆုပ်နိုင်ဖို့ ရည်ရွယ်ပါတယ်၊ နောက်ပြီး AWA မှာ ရင်းနှီးမြှုပ်နှံခြင်းအားဖြင့် မဟာဗျူဟာမြောက် ရည်မှန်းချက်ကို ထောက်ကူ ပေးနိုင်ပါလိမ့်မယ်” ဟု ANA က ပြောသည်။

AWA လေကြောင်းလိုင်းသည် စစ်အစိုးရလက်ထက် ၂၀၁၀ ရွေးကောက်ပွဲမတိုင်မီ စတင် ထူထောင်သည့် လေကြောင်းလိုင်းဖြစ်ပြီး ထိုစဉ်က စီးပွားရေးလုပ်ငန်းရှင်ကြီး ဦးတေဇနှင့် Sun Far Travels & Tours Co., Ltd ကုမ္ပဏီတို့ ပူးပေါင်းကာ ပြည်တွင်း၌ ပြေးဆွဲပျံသန်းရန် ထူထောင်ခဲ့သည်ဟု ပြည်တွင်းစီးပွားရေး အသိုင်းအဝိုင်းမှ သိရသည်။

ဦးတေဇသည် စစ်အစိုးရနှင့် နီးစပ်ခဲ့သူဖြစ်ပြီး အမေရိကန်နိုင်ငံနှင့် အနောက်နိုင်ငံများမှ စီးပွာေးရးပိတ်ဆို့မှု စာရင်းထဲတွင် ရှိနေဆဲဖြစ်သည်။

သို့သော် ANA က AWA လေကြောင်းလိုင်း၏ အစုရှယ်ယာကို ဝယ်ယူမည်ဟု သတင်းများ ထွက်ပေါ်လာချိန်တွင် AWA ကို မည်သည့် ပြည်တွင်းစီးပွားရေး လုပ်ငန်းရှင်က ပိုင်ဆိုင်ကြောင်း သတင်းဌာနများက ဖော်ပြခြင်းမရှိပေ။

AWA လေကြောင်းလိုင်းသည် ပြီးခဲ့သည့် သြဂုတ်လက ရန်ကုန်မြို့နှင့် ထိုင်းနိုင်ငံ ချင်းမိုင်မြို့သို့ အပတ်စဉ်ပြေးဆွဲရန် စီစဉ်ခဲ့သော်လည်း လတ်တလောတွင်မူ အစီအစဉ်ကို ဖျက်သိမ်းထားသည်ဟု သိရသည်။

လက်ရှိ ရန်ကုန်- ချင်းမိုင် တပတ်နှစ်ကြိမ် ခရီးစဉ်ကို ဦးတေဇပိုင် Air Bagan လေကြောင်းလိုင်းမှ ပြေးဆွဲလျက်ရှိသည်။

Source : Irrawaddy

ရန်ကုန် ဟိုတယ်ဇုန် အစီအစဉ် ဖျက်သိမ်း

ဒီနှစ် အစပိုင်းက ရန်ကုန် တိုင်း ဟိုတယ် ဇုန် ဆောက် မယ့် အစီ အစဉ် အတွက် မြေ နေရာ ရှာ မရလို့ ဖျက်သိမ်း လိုက်ပြီလို့ ရန်ကုန်တိုင်း ဟိုတယ် လုပ်ငန်းရှင်များ အသင်းက ပြောပါတယ် ။

ရန်ကုန် ဟိုတယ်ဇုန် ဆောက်ဖို့ လျာထား ခဲ့တဲ့ နေရာတွေက ရန်ကုန် - နေပြည်တော် အမြန် လမ်းမကြီး အစ လှည်းကူး မြို့နယ်က နေရာ၊ မှော်ဘီ မြို့နယ် ညောင်နှစ်ပင် အနီးနဲ့ မင်္ဂလာဒုံ မြို့နယ်ထဲက နေရာတွေ ပါပါတယ် ။

ဒါပေမဲ့ ဒီနေရာ တွေကို ဟိုတယ်ဇုန် ဆောက်ဖို့ သွား ကြည့်ပြီး နောက်ပိုင်း ဈေးတွေ ထိုးတက်လာပြီး စစ်တပ်ပိုင်မြေ တွေလည်း ပါနေလို့ မ,စနိုင် တာ ဖြစ်ပါတယ် ။

မြန်မာနိုင်ငံမှာ ဟိုတယ်ဇုန် ဆောက်မယ် ဆိုပြီး မြေ သိမ်းမှုတွေ ၂ဝဝဝ ပြည့်နှစ် ဝန်းကျင်က စလို့ အထူး များပြား လာပါတယ် ။

အထင်ရှားဆုံး ဥပမာကတော့ (၁၃) နှစ် လောက် ကြာတဲ့အထိ ဟိုတယ်တွေ မဆောက်နိုင် သေးတဲ့ ငွေဆောင် ကမ်းခြေ ဟိုတယ်ဇုန် စီမံကိန်း ၂ ဖြစ်ပါတယ် ။

လက်ရှိ ဟိုတယ်ဇုန်တွေ အသစ် ဖော်တဲ့ နေရာမှာ မြေယာ အငြင်းပွား မှု ပြဿနာ တွေ ရှိနေလို့ ဒီလို စီမံကိန်းတွေကို ချိန်ဆလာတဲ့ သဘော ရှိပါတယ် ။

ဒီလို စီမံကိန်းတွေ ဖြစ်မယ်လို့ သတင်းတွေမှာ ဖော်ပြပြီးမှ ပျက်သွားတာမျိုးဟာ နိုင်ငံတကာ ရင်းနှီး မြုပ်နှံသူ တွေရဲ့ စိတ်ဝင်စားမှုကို လျော့ကျစေပါတယ် ။

ကမ္ဘာလှည့် ခရီးသွားတွေ လာတာများလို့ မြန်မာနိုင်ငံအနှံ့ ဟိုတယ်ဇုန် စီမံကိန်း (၁၁) ခုထိ ဖော်ထုတ်ဖို့ ဟိုတယ် လုပ်ငန်းရှင်တွေက အဆိုပြု ခဲ့ပြီး မန္တလေး၊ ပုဂံ ၊ အင်းလေး စတဲ့ ဒေသတွေမှာ စီမံကိန်း တွေ စနိုင်နေပြီ ဖြစ်ပါတယ်။

Source : BBC Burmese

အပူပိုင်း မုန်တိုင်း ချီဘီကြောင့် ဟိုင်နန်လေဆိပ်၌ ခရီးသည်ပေါင်း ၅ဝဝဝ ကျော်သောင်တင်

အပူပိုင်းမုန်တိုင်း ချီဘီသည် သြဂုတ် ၂ ရက် ညနေပိုင်းက ကုန်းတွင်း ပိုင်းသို့ ဝင်ရောက် လာသောကြောင့် တရုတ် နိုင်ငံ တောင်ပိုင်း ဟိုင်နန်ပြည်နယ် လေဆိပ်ရှိ ခရီးသည်ပေါင်း ၅ဝဝဝ ကျော် မှာ ဆန်ညာ ဖို့ခွမ် လေဆိပ်၌သောင်တင် ခဲ့ရကြောင်း သိရသည်။

ဒေသစံတော်ချိန် မွန်းလွဲ ၁ နာရီခွဲတွင် မုန်တိုင်းမှာ ကုန်းတွင်းပိုင်းသို့ ဝင်ရောက်ရန် နီးကပ် လာပြီ ဖြစ်သောကြောင့် အဆိုပါ လေဆိပ်ရှိ လေယာဉ် ခရီးစဉ် ၁ဝဝ ခန့်အား ဖျက်သိမ်း ခဲ့ ရကြောင်း သိရသည်။ ထိုလေယာဉ် ခရီးစဉ်များမှာ ပြည်တွင်း ဝင်ရောက် လေယာဉ် ခရီး စဉ်ပေါင်း ၅၆ ခုနှင့် ပြည်ပ ထွက်ခွာ လေယာဉ် ခရီးစဉ်ပေါင်း ၄၃ ခုတို့ ဖြစ်သည်။ လေကြောင်း လိုင်း တာဝန် ရှိသူ များနှင့် လေဆိပ် တာဝန် ရှိသူ များသည် အဆိုပါ ခရီးသည်များ အတွက် နေရာ ထိုင်ခင်းများ စီစဉ် ပေးခဲ့ ရကြောင်း။

 Source : Myawady News

ကလော၊ ပုဂံနှင့် ရန်ကုန်တို့တွင် ငှက်ကြည့် အခြေခံသင်တန်းများ ဖွင့်မည်

ကမ္ဘာလှည့် ခရီးသွားဧည့်သည် သိသိသာသာ ဝင်ရောက်မှု များပြားလာသော မြန်မာနိုင်ငံ၌ သဘာဝအခြေခံ ခရီးသွားလုပ်ငန်း ဖွံ့ဖြိုးတိုးတက်ရန် ရည်ရွယ်လျက် အဆိုပါ ခရီးသွားဧည့်သည်များ အများဆုံး သွားရောက် လည်ပတ်ရာ ကလော၊ ပုဂံနှင့် ရန်ကုန်မြို့တို့တွင် ဧည့်လမ်းညွှန်များကို ငှက်ကြည့်ခြင်း အခြေခံသင်တန်းများ မကြာမီ ဖွင့်လှစ်ပို့ချသွားမည် ဖြစ်ကြောင်း မြန်မာငှက်နှင့် သဘာဝပတ်ဝန်းကျင် ထိန်းသိမ်းရေးအသင်းထံမှ သိရှိရသည်။ အဆိုပါ သင်တန်းကို မြန်မာနိုင်ငံ ဧည့်လမ်းညွှန်များအသင်း (ရှမ်းပြည်နယ် တောင်ပိုင်းဇုန်)နှင့် ပူးပေါင်းစီစဉ်မှုဖြင့် ရှမ်းပြည်နယ်တောင်ပိုင်း ကလောမြို့ မင်္ဂလာခန်းမတွင် ဇူလိုင်လ ၂၁ ရက်မှ ၂၃ ရက်နေ့အထိ လည်းကောင်း၊ မြန်မာနိုင်ငံ ဧည့်လမ်းညွှန်များအသင်း (ပုဂံဇုန်)နှင့် ပူးပေါင်းစီစဉ်မှုဖြင့် ပုဂံမြို့ လောကနန္ဒာဘုရား၌ ဇူလိုင်လ ၂၉ ရက်မှ ၃၁ ရက်နေ့အထိ လည်းကောင်း၊ မြန်မာငှက်နှင့် သဘာဝပတ်ဝန်းကျင် ထိန်းသိမ်းရေး အသင်း၏ အစီအစဉ်ဖြင့် ရန်ကုန်မြို့ တော်ဝင်နှင်းဆီခန်းမနှင့် လှော်ကားဥယျာဉ်တို့၌ သြဂုတ်လ ၉ ရက်မှ ၁၁ ရက်နေ့အထိ လည်းကောင်း အသီးသီးဖွင့်လှစ် ပို့ချသွားမည် ဖြစ်ကြောင်း၊ သင်တန်းတွင် မြန်မာနိုင်ငံရှိ ငှက်မျိုးစိတ်များ၊ ငှက်ကြည့်လေ့လာနည်းများနှင့် ငှက်မျိုးစိတ် ခွဲခြားနည်း၊ ရာသီပြောင်း ဆောင်ခိုငှက်များနှင့် ၄င်းတို့ပျံသန်းရာ လမ်းကြောင်းများ၊ ငှက်ကြည့် မှန်ပြောင်းနှင့် Field Guide စာအုပ် အသုံးပြုနည်း၊ ဇီဝမျိုးစုံမျိုးကွဲများနှင့် သဘာဝပတ်ဝန်းကျင် ထိန်းသိမ်းရေး စသည့် ဘာသာရပ်များကို မြန်မာငှက်နှင့် သဘာဝပတ်ဝန်းကျင် ထိန်းသိမ်းရေးအသင်းနှင့် တက္ကသိုလ်များမှ ကျွမ်းကျင်ပညာရှင်များနှင့် ပါမောက္ခဆရာ၊ ဆရာမများက စာတွေ့လက်တွေ့ သင်ကြားပို့ချသွားမည် ဖြစ်ကြောင်း အသင်းအမှုဆောင်တစ်ဦးက ပြောပြခဲ့သည်ဟု ၂၀၁၃ ခုနှစ် ဇူလိုင်လ ၁၅ ရက်နေ့ထုတ် The Voice ဂျာနယ်တွင် ဖော်ပြထားပါသည်၊။

Source : Khit Lu Nge

ဗုဒ္ဓဂါယာတိုက်ခိုက်မှု အိန္ဒိယအစိုးရအပြင်းအထန်ရှုတ်ချ

အိန္ဒိယနိုင်ငံအရှေ့ဘက် ဘီဟာပြည်နယ်က ဗုဒ္ဓဘာသာဝင်တွေ အထွဋ်အမြတ် ထားရာ ဗုဒ္ဓဂါယာမှာ တနင်္ဂနွေနေ့က ဗုံးတွေဆက်တိုက် ပေါက်ကွဲခဲ့တဲ့ အတွက် မြန်မာနိုင်ငံသား ရဟန်းတော် တပါး အပါအ၀င် ဘုရားဖူး ၂ ဦး ဒဏ်ရာရရှိခဲ့ပြီး၊ ထိခိုက်ပျက်စီးမှုတွေလည်း ရှိခဲ့ပါတယ်။ ကုလသမဂ္ဂ ပညာရေး၊ လူမှုရေးနဲ့ ယဉ်ကျေးမှုဆိုင်ရာ အဖွဲ့ဖြစ်တဲ့ UNESCO က ကမ္ဘာ့ယဉ်ကျေးမှု အမွေအနှစ်တခုအဖြစ် သတ်မှတ်ထားတဲ့ နယ်မြေမှာ ဖြစ်ပွားခဲ့တဲ့ တိုက်ခိုက်မှုအတွင်း ဒဏ်ရာရရှိခဲ့တဲ့ နောက်ထပ် တိဘက် သံဃာတော်ကတော့ ဒဏ်ရာ ပြင်းထန်ပုံ ရတယ်လို့လည်း မျက်မြင်တွေ့ခဲ့တဲ့ ဘုရားဖူးသံဃာတော် တပါးက မိန့်ပါတယ်။

“ကျောင်းဝင်းထဲမှာ ဗုံးပေါက်ကွဲတော့ အထိတ်တလန့် ဖြစ်ကုန်ကြပါ တယ်။ မြန်မာဘုန်းကြီး တပါး ဒဏ်ရာရပါတယ်။ နောက်ပြီး တိဘက် ဘုန်းတော်ကြီး တပါးလည်း ဒဏ်ရာတော်တော် ပြင်းပြင်းထန်ထန် ရပြီး သွေးတွေလည်း အများကြီးထွက်တာ တွေ့ပါတယ်။”
ပထမဆုံးဗုံး ၄ လုံးဟာ မဟာဗောဓိဘုရားကျောင်းဝင်းထဲမှာ ပေါက်ကွဲ ခဲ့တာဖြစ်ပြီး၊ နောက်ဆက်တွဲ အနီးအနားက ဘုန်းတော်ကြီးကျောင်းဝင်း တခုထဲမှာလည်း ၃ လုံးပေါက်ကွဲခဲ့သလို၊ ဉာဏ်တော်အမြင့်ပေ ၈၀ ရှိတဲ့ မဟာဗောဓိစေတီတော်အနီးနားမှာလည်း  နောက်ထပ် ၁ လုံးထပ်ပြီးပေါက်ကွဲ ခဲ့တာ ဖြစ်တဲ့အကြောင်း အိန္ဒိယ အာဏာပိုင်တွေ ကပြောပါတယ်။ ထိခိုက်ဒဏ်ရာတွေ ရသွားတဲ့ သံဃာတော်တွေကတော့ မဟာဗောဓိ စေတီတော် အနီးအနားက ပေါက်ကွဲမှုကြောင့် ဖြစ်တယ်လို့လည်း မျက်မြင်တွေ့ခဲ့သူ သံဃာတော်က မိန့်ပါတယ်။

“ဘုန်းကြီးတပါးရဲ့ ဒဏ်ရာက တော်တော်ပြင်းပါတယ်။ ဘွဲ့ကိုတော့ မသိပါဘူး။ မဟာဗောဓိပင်တံတား နောက်ဘက်မှာ အသံအကျယ်ကြီး ပေါက်ကွဲခဲ့တာပါ။ ကျနော်တို့ ကြားသလောက်ဆိုရင် ကျောင်းဝင်းထဲမှာတင် ၄ လုံး ပေါက်ခဲ့ ပါတယ်။”
တိုက်ခိုက်ခံခဲ့ရတဲ့ နေရာဟာဆိုရင်တော့ ဂေါတမ မြတ်စွာဘုရား သဗ္ဗေညုတ ရွှေဉာဏ်တော်ရရှိခဲ့တဲ့ မဟောဗောဓိ ညောင်ပင်ရှိရာ နေရာအဖြစ်၊ ဗုဒ္ဓဘာသာဝင်တွေ အထွဋ်အမြတ်ထားတဲ့နေရာဖြစ် ပါတယ်။ နှစ်စဉ်နှစ်တိုင်း မြန်မာနိုင်ငံသားတွေ အပါအ၀င် ဘုရားဖူးသူတွေ ထောင်သောင်းချီပြီး လာရောက် လည်ပတ်လေ့ရှိကြပါတယ်။ ဒီလိုဘာသာရေးအရ အထွဋ်အမြတ်ထားတဲ့နေရာတွေကို အခုလို ပစ်မှတ်ထားပြီး ဗုံးခွဲတိုက်ခိုက်တဲ့အပေါ် အိန္ဒိယ၀န်ကြီးချုပ် မန်းမိုဟန်ဆင်းကတော့ အပြင်းအထန် ရှုတ်ချလိုက်ပြီး တိုက်ခိုက်မှုကိုလည်း သည်းခံမှာ မဟုတ်တဲ့အကြောင်း ပြောဆိုခဲ့ပါတယ်။
ဒီတိုက်ခိုက်မှုနဲ့ပက်သက်ပြီး ဘယ်သူဘယ်ဝါရဲ့ လက်ချက်ဖြစ်တယ်ဆိုတာတော့ ချက်ချင်းမသိရသေးပါဘူး။ ဒါပေမဲ့ ဒီတိုက်ခိုက်မှုဟာ မကြာသေးခင်က  အိမ်နီးချင်းမြန်မာနိုင်ငံ အတွင်း ဗုဒ္ဓဘာသာ နဲ့ မူဆလင်တွေအကြားဖြစ်ပွားခဲ့တဲ့ ပဋိပက္ခတွေအပေါ် လက်တုံ့ပြန်တဲ့အနေနဲ့၊ စစ်သွေးကြွတွေက ပြန်ပြီး တိုက်ခိုက်တာဖြစ်တယ်လို့ အိန္ဒိယရဲဌာန နဲ့၊ အတိုက်အခံပါတီခေါင်းဆောင် တချို့က စွပ်စွဲနေကြပါတယ်။
အိန္ဒိယနိုင်ငံခြားရေးဝန်ကြီး Salman Khurshid ကတော့ ဒီဗုံးတွေကို ဘယ်သူတွေဖောက်ခွဲတယ် ဆိုတာကို တိကျတဲ့ သတင်းအချက်အလက်တွေ မရမချင်း  တစုံတရာ မှတ်ချက်မပေးနိုင်သေးတဲ့အကြောင်း၊ အများပြည်သူ ငြိမ်းငြိမ်းချမ်းချမ်း ဆုတောင်းမေတ္တာပို့သတဲ့ ဘာသာရေးနယ်မြေမှာ အခုလို သူရဲဘောကြောင်တဲ့ လုပ်ရပ်မျိုးကို လုပ်ခဲ့တဲ့အတွက်ကြောင့် ဒီဖြစ်ရပ်အတွက် အတော်လေးကို ၀မ်းနည်းမိကြောင်း အိန္ဒိယနိုင်ငံအနောက်မြောက်ဘက် Rajastahn ပြည်နယ်၊ Jaipur မြို့တော်မှာ ပြာဆိုသွားခဲ့ပါတယ်။ စုံစမ်းစစ်ဆေးမှုတွေပြုလုပ်ပြီး သတင်းအချက်အလက်တွေ ပိုပြီးရလာတဲ့အခါ ဒီကိစ္စနဲ့ ပက်သက်ပြီး ဆွေးနွေးသွားမှာဖြစ်တယ်လို့လည်း သူကပြောပါတယ်။ အိန္ဒိယ အမျိုးသားထောက်လှမ်းရေး အေဂျင်စီ (NIA) ကလည်း ဒီပေါက်ကွဲမှုတွေနဲ့ ပက်သက်ပြီး စုံးစမ်းစစ်ဆေးမှုတွေ ပြုလုပ်သွားမယ် လို့ပြောပါတယ်။
တနင်္ဂနွေနေ့ အစောပိုင်းက ဖြစ်ပွားခဲ့တဲ့ ပေါက်ကွဲမှုတွေ နောက်ပိုင်းမှာတော့ ဗုဒ္ဓဂါယာ အနီးတ၀ိုက်မှာ လုံခြုံရေးတွေကို တိုးမြှင့်ချထားလိုက်ပြီး အာဏာပိုင်တွေက သတိပေး နှိုးဆော်ချက်တွေလည်း ထုတ်ပြန်ခဲ့ပါတယ်။ သက်ဆိုင်ရာ လုံခြုံရေး တပ်ဖွဲ့ဝင်တွေ အနေနဲ့လည်း ခရီးသွားတွေရဲ့ ခန္ဓာကိုယ်ပေါ်နဲ့ သူတို့နဲ့အတူပါလာတဲ့ ခရီးဆောင်အိပ်တွေကို ရဲတွေက ပိုက်စိပ်တိုက်ပြီး ရှာဖွေနေကြပါတယ်။ ဗုဒ္ဓဂါယာမှာ တိုက်ခိုက်မှု ဖြစ်ပွားပြီးနောက် အနီးအနား ပြည်နယ်တွေမှာလည်း လုံခြုံရေးအတွက် သတိထားကြဖို့နဲ့ မသင်္ကာသူတွေကို ရှာဖွေစစ်ဆေးဖို့လည်း အာဏာပိုင်တွေက ညွှန်ကြားချက်တွေ ထုတ်ပြန်ထားလိုက်ကြပါတယ်။
Source : VOA (Burmese)