ကျွန်တော် Kuji မြို့ကိုရောက်တဲ့အခါ အနီးအနားမှာ စိတ်ဝင်စားစရာ လည်ပတ်နိုင်တဲ့နေရာတချို့ကို Google maps မှာရှာကြည့်ရင်း Suwa Park အနီးအနားက သစ်သားနဲ့ဆောက်လုပ်ထားတဲ့ တိုရီးခိ (ဝင်ပေါက် ဗိမာန်တံတား) ကိုတွေ့တဲ့အခါ သွားရောက်ဖြစ်ခဲ့ပါတယ်။ ဒီနေရာက Suwa Park အနီးနားလေးမှာပါ။ တကိုယ်တည်း လမ်းလျှောက်ထွက်ခဲ့ရင်း တောင်ခြေကဟောင်းနွမ်းဆွေးမြေ့နေတဲ့ မုဒ်ဦးဝနှင့် ကျောက်တုံး ၂တုံးပေါ်မှာ ကဗျည်းထိုးထားတဲ့နေရာကိုရောက်ရှိခဲ့ပါတယ်။ မုဒ်ဦးဝကနေတောင်ပေါ်တက်တဲ့ လှေခါးအတိုင်း ဆက်တက်လာတဲ့အခါ တောင်ပေါ်ထင်းရှူးတောအုပ်ထဲမှာ ပန်းခြံငယ်လေးနှင့် အပန်းဖြေနားခိုနိုင်မည့် နေရာတချို့ရှိပြီး တောင်ပေါ်ကနေ Kuji Bay ကိုလှမ်းမြင်ရတဲ့ လှပတဲ့ရှုခင်းတွေကို တွေ့မြင်ရပါတယ်။
ပန်းခြံငယ်လေးကနေ ထင်းရှူးပင်တွေကြားမှာ တောင်ကုန်းအပေါ်ကို ဆက်သွားလို့ရတဲ့ လမ်းပြေပြေလေးတွေ့တာနဲ့ ဆက်ပြီးလျှောက်သွားကြည့်လိုက်တဲ့အခါ လမ်းအဆုံးမှာ ကြီးမားတဲ့ပင်စည်တွေနှင့် မြင့်မားတဲ့ထင်းရှူးပင်တွေကြားက မြေကွက်လပ်တခုမှာ သစ်သားဖြင့်ဆောက်လုပ်ထားတဲ့ ရှေးဟောင်းကျောင်းဆောင်တခုကို အမှတ်မထင်တွေ့မြင်လိုက်ရပါတယ်။
တောင်ခြေကနေစပြီး ဒီဘုရားကျောင်းအထိတိတ်ဆိတ်ငြိမ်သက်နေကာ တခါတရံငှက်သံတချို့ကိုကြားရပြီး တောင်ပေါ်မှာမိမိတဦးတည်းသာရှိနေခဲ့ပါတယ်။ ဘုရားကျောင်းဝင်းထဲကို ဝင်ရောက်ကြည့်တဲ့အခါ ဝင်ပေါက်မုဒ်ဦးဝ လမ်းငယ်လေးဘေးတဖက်မှာ ဆုတောင်းစာတချို့ချိတ်ဆွဲထားတာတွေ့ရပြီး ထင်းရှူးပင်တွေအောက်မှာ နတ်ကွန်းငယ်တချို့ကိုလည်း တွေ့မြင်ရပါတယ်။ ဘုရားကျောင်းရဲ့အရှေ့မှာတော့ ထူးခြားတဲ့လက်ရာနှင့် Komainu (အစောင့်ဘေးတိုက်ခွေးရုပ်) တို့ကိုတွေ့မြင်ရပါတယ်။ ဘုရားကျောင်းကိုတော့ Honden (ပင်မကိုးကွယ်ရာအဆောက်အအုံ) နှင့် Haiden (ပူဇော်ပသရာအဆောက်အအုံ) တို့ကို သစ်သားများဖြင့် လက်ရာမြောက်စွာ ဆက်စပ်လျက်ဆောက်လုပ်ထားပါတယ်။ ဘုရားကျောင်းကို လှည့်ပတ်လေ့လာရင်း အမှတ်တရဓတ်ပုံရိုက်ပြီး သာယာပြီးတိတ်ဆိတ်အေးချမ်းတဲ့ Kuji Bay ရဲ့ရှုမျော်ခင်းတွေကို တောင်ပေါ်ကနေ ခံစားကြည့်ရှုပြီး တောင်အောက်ကို ပြန်ဆင်းလာခဲ့ပါတယ်။ ပြန်ရောက်တဲ့အခါ ဒီဘုရားကျောင်းအကြောင်းကို ရှာဖွေကြည့်တဲ့အခါ စိတ်ဝင်စားဖွယ်သမိုင်းကြောင်းကိုတွေ့ရှိခဲ့ပြီး ရေးသားတင်ပြလိုက်ပါတယ်။
Osamaicho Suwa Shrine လို့အမည်ရတဲ့ ဂျပဋ်ရိုးရာ Shinto ဘုရားကျောင်းဟာ ဂျပန်နိုင်ငံ Iwate Prefecture, Kuji City ရှိ ရှေးဟောင်း Shinto ဘုရားကျောင်းတစ်ခုဖြစ်ပါတယ်။ Kuji မြို့ရဲ့ Osamaicho ရပ်ကွက်မှာရှိတဲ့ဒီဘုရားကျောင်းဟာသမိုင်းနဲ့ ဒဏ္ဍာရီတွေ ပေါင်းစပ်ထားတဲ့ ရှေးဟောင်း Shinto ဘုရားကျောင်းတစ်ခုဖြစ်ပြီး Takeminakata-no-Kami ကို အဓိက ပူဇော်ထားပြီး စစ်ပွဲ၊ လယ်ယာ၊ သဘာဝ၊ အောင်မြင်မှုတို့နဲ့ ဆက်နွယ်တဲ့ နတ်ဘုရားအဖြစ် ယုံကြည်ကြပါတယ်။
ဘုရားကျောင်းရဲ့ မူလအစသည် လွန်ခဲ့တဲ့ ခန့်မှန်းအားဖြင့် ၈၅၀ နှစ်ခန့်.(12th century ဝန်းကျင်) ရှိပြီးဒေသခံတွေရဲ့ ဒဏ္ဍာရီအရ ဂျပန်နာမည်ကြီး စစ်ဘုရင် မီနာမိုတို နို ယိုရှီဆုန်း (Minamoto no Yoshitsune) ဟာ Hiraizumi စစ်ပွဲနောက်ပိုင်းမှာ Kuji မြို့အထိ ထွက်ပြေးရောက်ရှိခဲ့ပါတယ်။ ယိုရှီဆုန်းဟာ ဆိပ်ကမ်းတစ်ဝိုက်ကို ကြည့်ရှုပြီး ဒီနေရာကနေ ဟော့ကိုင်းဒိုးကိုသွားဖို့ လမ်းကြောင်းကို စီစဉ်နေစဉ်မှာပဲ ၎င်းတို့ကိုလိုက်လံဖမ်းဆီးတဲ့ စစ်တပ်က ဟာတာကီယာမာ ရှီဂေတာဒါ (Hatakeyama Shigetada) ရောက်လာခဲ့ပါတယ်။ ရန်သူဖြစ်ပေမယ့် ယိုရှီဆုန်းကို နှလုံးသားထဲတွင် လေးစားသော ရှီဂေတာဒါသည် ယိုရှီဆုန်းအား မြားတစ်စင်းပစ်လွှတ်ကာ သူ့ကိုမထိမိစေရန် ဆုတောင်းခဲ့ပါတယ်။ မြားက ထင်းရှူးပင်တပင်ကို ထိမှန်ခဲ့ပြီး ယိုရှီဆုန်းသည်လည်း မြောက်ဘက်သို့ ဘေးကင်းစွာ ထွက်ပြေးနိုင်ခဲ့ပါတယ်။ ဟာတာကီယာမာ ရှီဂေတာဒါလည်း သူ၏မြားက ယိုရှီဆုန်းကို မထိမိသည့်အတွက် ဒီအဖြစ်အပျက်ကို သဘာဝဘုရား၏ ကာကွယ်မှုအဖြစ်ယုံကြည်ခဲ့ပြီး မြားကိုသင်္ကေတအဖြစ် အထိမ်းအမှတ်နတ်ကွန်းတစ်ခု တည်ဆောက်ခဲ့ပါတယ်။ ဒါကြောင့်ဒီနတ်ကွန်းဟာ မီနာမိုတို နို ယိုရှီဆုန်း၏ မြောက်ဘက်ခရီးစဉ် ဒဏ္ဍာရီ နေရာဖြစ်တယ်လို့ ဆိုကြပါတယ်။
ဝတ်ပြုရာခန်းမကို 1791 ခုနှစ်တွင် တည်ဆောက်ခဲ့ပြီး အဓိကခန်းမကို 1856 ခုနှစ်မှာ တည်ဆောက်ခဲ့ပါတယ်။ ကူနိုဟေ (Kunohe) ဒေသရှိ ရှေးအကျဆုံး သစ်သားအဆောက်အအုံများထဲမှ တစ်ခုဖြစ်လာခဲ့ပြီး အနုစိတ်ထွင်းထားသည့် ရိုးရာလက်မှုပညာများ ပါရှိပါတယ်။ အဓိကခန်းမနှင့် ဝတ်ပြုရာခန်းမကို Kuji မြို့၏ ယဉ်ကျေးမှုဆိုင်ရာ အမွေအနှစ်များအဖြစ် သတ်မှတ်ထားပါတယ်။ ထူးခြားချက်တစ်ခုကတော့ ဘုရားကျောင်းကို စောင့်ကြပ်တဲ့ ကိုမိုက်နူး ခွေးခြင်္သေ့ကို သာမန်ခွေးပုံစံနဲ့ ဆင်တူအောင် ဒီဇိုင်းလုပ်ထုဆစ်ထားခြင်း ဖြစ်ပါတယ်။
ထင်းရှူးပင်များ ဝန်းရံထားတဲ့ တောင်ကုန်းပေါ်မှာတည်ရှိသည့် Osamaicho Suwa Shrine ဟာလျှို့ဝှက်ဆန်းကြယ်ပြီး တိတ်ဆိတ်တဲ့ပါတ်ဝန်းကျင်နှင့် သန့်ရှင်းလတ်ဆတ်သော လေထုကို ပေးစွမ်းပါတယ်။ ဒီနေရာကနေ Kuji ဆိပ်ကမ်းကို မျှော်ကြည့်နိုင်ပါတယ်။ ဒီဘုရားကျောင်းဟာ Kuji မြို့ရဲ့ ရိုးရာယဉ်ကျေးမှုကို ကိုယ်စားပြုသည့်နေရာဖြစ်ပြီး သဘာဝ၊ သမိုင်းနှင့် ယဉ်ကျေးမှုတို့ ပေါင်းစပ်ထားတဲ့ ထူးခြားတဲ့ ခံစားချက်ကို ရရှိနိုင်ပါတယ်။ ဒေသခံလူထုအတွက်တော့ ဒီဘုရားကျောင်းဟာ ကာကွယ်ခြင်း၊ ကံကောင်းခြင်းနှင့် စိတ်ပိုင်းဆိုင်ရာအထောက်အပံ့တို့ကို ယုံကြည်ရာ နေရာတခုဖြစ်လာခဲ့ပါတယ်။
🎎 Osamaicho Suwa Shrine မှာယနေ့အထိ ရှင်သန်နေဆဲ ရိုးရာပွဲတော်များရှိနေပြီး နွေဦး 🌸 နှင့် ဆောင်းဦး 🍁 ပွဲတော်များကို ယနေ့အထိ ဆက်လက်ကျင်းပနေဆဲဖြစ်ပါတယ်။ ပွဲတော်အချိန်မှာ Mikoshi (portable shrine) ရိုးရာအက၊ ဒေသခံပွဲလမ်းများ စသည်တို့ကိုတွေ့မြင်နိုင်ပြီး Kuji မြို့ရဲ့ ရိုးရာယဉ်ကျေးမှုတို့ကို ခံစားလေ့လာနိုင်ပါတယ်။
Osamaicho Suwa Shrine ဟာ ခရီးသွားများအတွက် အဓိပ္ပါယ်ရှိတဲ့နေရာတခုဖြစ်ပြီး သမိုင်းကို စူးစမ်းလိုသူ၊ Shinto ဘာသာ ယဉ်ကျေးမှုကို လေ့လာလိုသူ၊ တိတ်ဆိတ်သဘာဝကို ခံစားလိုသူတွေအတွက် အထူးသင့်လျော်တဲ့ ခရီးသွားနေရာတစ်ခုဖြစ်ပါတယ်။ Kuji မြို့ကိုသွားရောက် လည်ပတ်တဲ့အခါ ဒီ ရှေးဘုရားကျောင်းကို သွားရောက်လည်ပတ်ခြင်းဖြင့် ဂျပန်ရဲ့ရိုးရာစိတ်ဝိညာဉ်နဲ့ သမိုင်းတို့ကို နားလည်နိုင်မယ့်
အတွေ့အကြုံတစ်ခုဖြစ်လာမှာ မလွဲမသွေပါ။
