ခရီးသွားအကျိုးဆောင်များမှတဆင့် ထိုင်းဗီဇာ လျှောက်ထားမှု ခေတ္တရပ်ဆိုင်းထား

မြန်မာနိုင်ငံဆိုင်ရာ ထိုင်းသံရုံးသို့ ဗီဇာလျှောက်ထားကြရာတွင် ခရီးသွားအကျိုးဆောင်များက အချက်အလက်အတုများဖြင့် လျှောက်တင်မှုကြောင့် အကျိုးဆောင်များမှ တဆင့် ဗီဇာလျှောက်တင်လာခြင်းအား သံရုံးမှ ယာယီ ရပ်ဆိုင်း ထားသည်ဟု သံရုံးဗီဇာဋ္ဌာနမှ ပြောသည်။

“ Fake Doucument (စာရွက်စာတမ်းအတု) တွေနဲ့တင်လို့ပါ။ တနင်္လာနေ့ကစပိတ်တာပါ။ အဲကိစ္စတွေကို ထိုင်းသံရုံးကို အေးဂျင့်က စာတင်ထားတာနဲ့ ပတ်သတ်လို့ ဘန်ကောက်ရုံးရဲ့ အဆုံးအဖြတ်ကို စောင့်နေပါတယ်” ဟု ထိုင်းဗီဇာဋ္ဌာနမှ YPI သို့ ပြောကြားသည်။
ယခုကဲ့သို့ ခေတ္တရပ်ဆိုင်းခြင်းကို အဂါင်္နေ့ နံနက်ပိုင်းတွင်မှ အတိအကျ သိရှိကြရသဖြင့် အကျိုးဆောင်များဖြင့် ဗီဇာလျှောက်ထားသူများ အခက်အခဲဖြစ်ကြရသည်ဟု ထိုင်းဗီဇာလျှောက်ထားသူများက ပြောသည်။
ယခုရက်ပိုင်းအတွင်း ဗီဇာလျှောက်ထားသူ အန်ဂျီအိုဝန်ထမ်းတဦးက “ မနေ့ကထိုင်းသံရုံးကို ဖုန်းဆက်တော့ ဘာမှမပြောဘူး။ နောက်Visa Officer နဲ့စကားပြောဖို့ တောင်းဆိုတော့ သူတို့က ဖက်စ်ထိုးခိုင်းတယ်။ နောက်ဗီဇာအရာရှိနဲ့ စကားပြောတော့ သူတို့က အေဂျင်စီနှစ်ခု (ခရီးသွားအကျိုးဆောင်) ပဲ ပိတ်တာလို့ ပြောတယ်။ လေယဉ်လက်မှတ် အတုနဲ့တင်လို့တဲ့။ နောက်တော့ ဗီဇာကို ချက်ချင်းထုတ်ပေးတယ်။ အဲဒီမှာ ကိုယ်တိုင် လာတင်တဲ့လူတွေလဲ တွေ့တယ်။ အဲဒီလူတွေကိုတော့ ထုတ်ပေးတယ်။ အေးဂျင့်ကိုအပ်ထားတဲ့ လူတွေတော့ ဒုက္ခရောက်တာပေါ့” ဟု ၀ိုင်ပီအိုင်သို့ ပြောသည်။

အကျိုးဆောင်ဖြင့် လျှောက်ထားခိုင်းရာမှ မရသဖြင့် ကိုယ်တိုင် လာရောက်ရသူ အခြားတဦးကလည်း “ပထမတော့ အေးဂျင့်နဲ့တင်တာ မရဘူးဆိုတော့ ကိုယ်တိုင်လာလျှောက်ရတယ်။ မနက် ၇ နာရီမှာ တိုကင်လာယူတာ နံပါတ်က ၁၀၄ ရောက်နေပြီ။ အရေးကြီးကိစ္စနဲ့ ထိုင်းနိုင်ငံသွားဖို့ လိုတယ်လို့ ဗီဇာဌာနကို ပြောတော့ နေ့ချင်းလုပ်ပေးလို့ ညနေ ၄နာရီခွဲမှာ ဗီဇာရတယ်” ဟု ပြောသည်။

ထိုင်းနိုင်ငံသည် ပြည်ပခရီးသည်များကို ဆွဲဆောင်သည့်အနေဖြင့် ပြည်ဝင်ခွင့်ဗီဇာကြေး ကင်းလွတ်ခွင့် ပြုသည့် အစီအစဉ်များကို မကြာခဏ ပြုလုပ်ပေးနေသော်လည်း မြန်မာနိုင်ငံသားများ အနက်ထိုင်းဗီဇာ ရရန်ခက်ခဲ ဆဲဖြစ်သည်။ ထိုင်းနိုင်ငံသို့ ပထမဆုံးသွားရောက်မည့် မြန်မာနိုင်ငံသားများ အနေနှင့် မြန်မာနိုင်ငံသို့ ပြန်လာမည့် အိမ်ခြံမြေ ဖုန်း ကား အစရှိသည်တို့ကို ပြသနိုင်မှ ထိုင်းဗီဇာ ရရှိနိုင်သည်။

“ထိုင်းနိုင်ငံက မြန်မာနိုင်ငံနဲ့ ဒီလောက်ဆက်ဆံရေး ကောင်းအောင် လုပ်နေတဲ့အချိန်မှာ မြန်မာနိုင်ငံသားတွေ ရဲ့ပိုင်ဆိုင်ခွင့်ကို  ပြခိုင်းထားတယ်။ ပြီးတော့ အာရှမှာ ထိုင်းက ဆိုက်ရောက်ဗီဇာ မပေးတာ မြန်မာ တနိုင်ငံထဲ ရှိတယ်လို့ ကြားတယ်။ ကမ္ဘောဒီးယားကိုတောင် ဆိုက်ရောက်ဗီဇာ ၁၅ရက်ပေးတယ်လို့ ကြားဖူးတယ်” ဟု အဆိုပါ ထိုင်းဗီဇာလျှောက်သူ အန်ဂျီအိုဝန်ထမ်းက ပြောသည်။

Source : thithtoolwin

ကလောမြို့သို့ အာရှခရီးသွားများ စတင်ဝင်ရောက်လာ

ရှမ်းပြည်နယ်တောင်ပိုင်း ကလောမြို့သို့ ယခင်နှစ်များက မလာဖူးသော အာရှဒေသမှခရီးသွားများ စတင်ဝင်ရောက်လာကြောင်း ကလောအခြေစိုက်ဟိုတယ်များနှင့် ခရီးသွားလုပ်ငန်းများမှ သိရသည်။
”ထိုင်းတို့ ကိုရီးယားတို့ဆို အရင်နှစ်တွေက မလာဖူးဘူး။ ဒီနှစ် ဒီဇင်ဘာလလောက်ကစပြီး ဝင်လာကြတယ်”ဟု Nature Land ဟိုတယ်မှ တာဝန်ရှိသူတစ်ဦး က ဖေဖော် ဝါရီ ၂၂ ရက်တွင် ပြောသည်။
၎င်းတို့သည် ဥရောပခရီးသွားများကဲ့သို့ ခြေကျင်ခရီးကြမ်းသွားခြင်းကို မပြုလုပ်ကြဘဲ ဟိုတယ်အတွင်း၌သာ အပန်းဖြေအနားယူ လေ့ရှိပြီး မြို့အတွင်းသို့သာ သွား လာလည်ပတ်ကြသည်ဟု ၄င်းက ပြောသည်။
ယခင်နှစ်များကတည်းက လာရောက်လေ့ရှိသော ဥရောပခရီးသွားများအပြင် ယခင်နှစ်များက မလာဖူးသော အမေရိကန်နှင့် အာရှမှ ခရီးသွားများ ဝင်ရောက်လာခြင်း တို့ကြောင့် ကလောရှိ ဟိုတယ်များ ဧည့်သည်ရရှိမှုမှာယမန်နှစ်ထက် ၂ဝ ရာခိုင်နှုန်းခန့် တိုးလာကြောင်း ဟိုတယ်လုပ်ငန်းရှင်များက ပြောသည်။
”မတ်လပထမပတ်လောက်ထိ ဘွတ်ကင်အပြည့်ပဲ၊ ဒီနေ့ဆို ထိုင်းအယောက် ၂ဝ လောက်လာ ဖို့ရှိတယ်” ဟု Nature Land မှ တာဝန်ရှိသူက ပြောသည်။
ကလောမြို့၏ ရာသီဥတုသာယာပြီး လှပသောရှုခင်းများကို ဧည့်သည်များက နှစ်သက်ကြခြင်းဖြစ်ပြီး ဥရောပဧည့်သည်များမှာမူ အနီးဝန်းကျင်ရွာများသို့ ခြေကျင် ခရီးကြမ်းသွားခြင်းကို ပြုလုပ်လေ့ရှိကြကြောင်း Golden Lily Guest Houseမှ ဒေါ်လီလီကလည်း ပြောသည်။
ကလောမြို့သို့ ဂျာမန်၊ ပြင်သစ်၊ အီတလီ၊ စပိန်လူမျိုးများ အများဆုံး လာရောက်ကြပြီး နှစ်စဉ် အောက်တိုဘာလမှ မတ်လအထိ ဧည့်သည်များ ပိုမိုဝင်ရောက်လေ့ ရှိကြောင်း ဒေသခံများထံမှ သိရသည်။
မေဇင်ဝင်း

Source : Popular Myanmar

ပုဂံမှာဧည့်များ အခန်းမလောက်

ပုဂံမှာ နိုင်ငံခြားဧည့်သည် ဝင်ရောက်မှုက မနှစ်ကထက် ပိုများတာကြောင့် ဟိုတယ်လုံလောက်မှု မရှိသလို ခရီးသွားတချို့ အခန်းမရတဲ့ အခက်အခဲတွေလည်း ရှိတယ်လို့ သိရပါတယ်။ ခရစ္စမတ်ပွဲတော်လောက်ကနေစပြီး ဧည့်သည်ဝင်ရောက်မှု များခဲ့သလို ဒီနေ့ထိ တစ်ရက်ကို ၇၀၀ နဲ့ ၉၀၀ ကြားလောက် ဧည့်သည်ဝင်ရောက်တယ်လို့ သိရပါတယ်။ ဧည့်သည်ဝင်ရောက်မှု များတာကြောင့် ပုဂံမြို့က မြင်းလှည်းသမားတွေလည်း ဝင်ငွေကောင်းတယ်လို့ ဆိုပါတယ်။ ပုဂံမြို့သစ်မှာရှိတဲ့ ဟိုတယ်တစ်ခုမှ တာဝန်ရှိသူက “ဒီနှစ် ဧည့်သည်ဝင်ရောက်မှုက အရင်နှစ်ကထက် များတယ်၊ ဟိုတယ်မှာတော့ အဆင်ပြေအောင် စီစဉ်ပေးပါတယ်၊ အခုက နိုင်ငံခြားခရီးသွားအပြင် တချို့က နိုင်ငံခြားမှာ ရောက်နေတဲ့ မြန်မာတွေလဲ လာရောက် လည်ပတ်ကြတာ တွေ့ရတယ်၊ နောက်နှစ် ဒီထက်များမယ်ဆိုရင် ဟိုတယ်တွေ လုံလောက်အောင် ထပ်ချဲ့သင့်တယ်” လို့ ပြောပါတယ်။ တချို့ကလဲ ဟိုတယ်မှာ ကြိုတင်ဘွတ်ကင် လုပ်တာရှိသလို တချို့က ပုဂံရောက်မှ အခန်းရှာတာမျိုးလည်း ရှိတယ်။ တချို့ဧည့်သည်က နှစ်ညအိပ်ကနေ ရက်တိုးပြီးနေတာတွေ ရှိတာကြောင့် အခန်းလုံလောက်မှု မရှိတာလို့ သိရပါတယ်။ တည်းခိုလို့ အဆင်ပြေမယ့် တည်းခိုခန်းလေးတွေ ရှိပေမယ့် တစ်နေ့တစ်နေ့ ဧည့်သည်ဝင်ရောက်မှု များတဲ့အခါ အခန်းလုံလောက်မှုက နည်းသွားပါတယ်။ နောက်နှစ်မှာ ဟိုတယ်လုံလောက်မှုရှိအောင် အခုကတည်းက ဟိုတယ်တွေ တိုးချဲ့ဖို့ လိုအပ်နေပြီလို့ ဟိုတယ်တချို့ကို မေးမြန်းချက်အရ သိရပါတယ်။ သီရိစန္ဒာ ဟိုတယ်ပိုင်ရှင် ပုဂံဟိုတယ်ဇုန် အတွင်းရေးမှူး ဦးဇော်ဝိတ်က “အခု အစကောင်းတဲ့အချိန် ဧည့်သည်တွေ အများအပြား ဝင်ရောက်နေတဲ့အချိန်မှာ ဟိုတယ်တွေ ထပ်ချဲ့သင့်တယ်၊ မဟုတ်ရင် တိုရစ်ဇင်(ခရီးသွား) ဦးကျိုးသွားလိမ့်မယ်၊ အခု ရှစ်သိန်းဝင်တဲ့အချိန်မှာ မလုပ်ရင် တခြားတိုးချဲ့စရာ တိုးချဲ့မှုမရှိရင် နောက်နှစ်ဧည့်သည် သန်းကျော်ဝင်တဲ့အခါ ဒုက္ခရောက်မယ်၊ ဒါက ဟိုတယ်ခရီးနဲ့ပဲ ဆိုင်တယ် ပြောလို့ မရဘူး၊ ဝန်ကြီးဌာနတွေရော အကုန်ပူးပေါင်းပြီးလုပ်မှ နောက်နှစ်အတွက် အဆင်ပြေမှု ရှိနိုင်မယ်” လို့ သူ့အမြင်ကို ပြောပါတယ်။ ပုဂံမြို့မှာ ဧည့်သည်အကြိုအပို့ ကားမောင်းသူတစ်ဦးကလည်း “ဒီနှစ် ဒီဇင်ဘာလလောက်ကတည်းက ဧည့်သည်တွေ အရမ်းဝင်တာ၊ နောက်နှစ်တစ်သန်း ဝင်မယ်လို့ တရားဝင် ကြေညာထားတာလဲရှိတော့ ဟိုတယ်တွေလဲ တိုးချဲ့ဖို့ လိုသလို ဒီထက်လဲ ပြုပြင်ပြောင်းလဲမှုတွေ လုပ်သင့်တယ်၊ အခုတော့ စည်းကမ်းပိုင်းကအစ အားနည်းနေသေးတယ်” လို့ သူ့အမြင်ကို ပြောပြခဲ့ကြောင်း ၂၀၁၂ ခုနှစ် ဖေဖော်ဝါရီလ ၂၄ ရက်နေ့ထုတ် မော်ဒန် သတင်းဂျာနယ်တွင် ဖော်ပြထားပါသည်။

Source : Khit Lu Nge

ခရီးသွားလုပ်ငန်း ဒီပလိုမာ B.A အဆင့်တိုးမြှင့် ဖွင့်လှစ်မည်

ခရီးသွားလုပ်ငန်း ဖွံ့ဖြိုးတိုးတက်လာသည်နှင့်အညီ ဘွဲ့လွန်ဒီပလိုမာသင်တန်းအဖြစ် ရန်ကုန်တက္ကသိုလ်က ၂၀၀၄ ခုနှစ်မှ စတင်သင်ကြားလျက်ရှိသော ခရီးသွားလုပ်ငန်း စီမံခန့်ခွဲမှုဘာသာရပ်ကို လေးနှစ်ကြာ တက်ရောက်ရမည့် ဝိဇ္ဇာဘွဲ့ B.A(Tourism) ဘာသာရပ်အဖြစ် ၂၀၁၂ ခုနှစ် ဒီဇင်ဘာလမှ စတင်ပြီး ရန်ကုန်နှင့် မန္တလေးတက္ကသိုလ်တို့တွင် စတင်ဖွင့်လှစ် သင်ကြားပေးသွားမည်ဖြစ်ကြောင်း Tourism ဘာသာရပ် သင်ကြားပို့ချလျက်ရှိသော ရန်ကုန်တက္ကသိုလ် မြန်မာစာဌာန၊ အငြိမ်းစားပါမောက္ခ ဒေါက်တာဒေါ်ခင်ဆွေမြင့်က ပြောကြားသည်။ “ပညာရေးဌာန ခွင့်ပြုပြီးပြီ။ ဒီနှစ်မှာစဖို့ အစီအစဉ်ရှိပါတယ်” ဟု ၄င်းကဆိုသည်။ ခရီးသွားလုပ်ငန်းနှင့် ပတ်သက်၍ တစ်နှစ်ဒီပလိုမာ သင်တန်းများကို ၂၀၁၂ ခုနှစ်အထိ ရန်ကုန်မြို့ အမျိုးသားစီမံခန့်ခွဲမှုပညာ ကောလိပ်တွင် ခြောက်ကြိမ်မြောက်အထိ ဖွင့်လှစ်ခဲ့ပြီး မန္တလေးတွင် ပထမအကြိမ် ဖွင့်လှစ်မည်ဖြစ်ကြောင်း၊ ဘွဲ့ရပြီး အသက် ၂၀ မှ အသက် ၅၀ ဝန်းကျင်အထိ တက်ရောက်ကြပြီး ယခုအခါတွင် ရန်ကုန်၌ သင်တန်းသား ၅၈ ဦး၊ မန္တလေး၌ ၅၂ ဦး တက်ရောက်လျက်ရှိကြောင်း ပါမောက္ခ ဒေါက်တာဒေါ်ခင်ဆွေမြင့်က ပြောကြားခဲ့သည်ဟု ၂၀၁၂ ခုနှစ် ဖေဖော်ဝါရီလထုတ် The Voice ဂျာနယ်တွင် ဖော်ပြထားပါသည်။

Source : Khit Lu Nge

၂၄ နာရီ ဖြေကြားပေးမည့် အလိုအလျောက် ဖြေကြားစက် ဟိုတယ်နှင့် ခရီးသွားလာရေး ဝန်ကြီး ဌာနတွင် တပ်ဆင်

ပြည်ပဧည့်သည်များ အတွက် သတင်းအချက် အလက်များကို ဖြေ ကြား ပေးနိုင်မည့် အလိုအလျောက် ဖြေကြား စက်ကို ဖေဖော်ဝါရီ ၁၂ ရက် မှစတင်၍ နေပြည်တော်ရှိဟိုတယ်နှင့် ခရီးသွားလာရေး ၀န်ကြီးဋ္ဌာနတွင် တပ် ဆင်ထားပြီး ဖြစ်ကြောင်းသိရသည်။
၂၄ နာရီလုံး ဖွင့်ပေးထားမည် ဖြစ်ပြီး အဓိက အားဖြင့် ရန်ကုန်၊  နေ ပြည်တော်၊ မန္တလေး၊ ပုဂံ၊ တောင်ကြီး မှ ဟိုတယ်ခရီးနှင့် ဆိုင်သောဌာနဆိုင် ရာ ဖုန်းနံပါတ်များအား ထည့်သွင်း ဖြေကြား ပေးသွားမည်ဖြစ်သည်။
အဆိုပါ စက်မျိုးများကို  တိုးချဲ့ တပ်ဆင် သွားရန်ရှိကြောင်း ဟိုတယ် နှင့်ခရီးသွားလာရေး ၀န်ကြီးဌာနမှ သိရသည်။ သိလိုသူများ သည် ဖုန်း-၀၆၇-၄၀၆၀၆၁သို့ စုံစမ်း မေးမြန်းနိုင် ကြောင်းသိရသည်။

source : The Myanmar Post